ശ്രീ നരസിംഹ ആരതി
ഭക്തിമാർഗ്ഗത്തിലെ വിഘ്നങ്ങൾ മാറ്റാൻ ഭഗവാൻ നരസിംഹദേവനോടുള്ള പ്രാർത്ഥന.
കൃഷ്ണകൃപാമൂർത്തി ശ്രീ ശ്രീമദ് എ.സി. ഭക്തിവേദാന്ത സ്വാമി പ്രഭുപാദർക്ക് കൃതജ്ഞതയോടെ.
സംസ്കൃത ശ്ലോകങ്ങൾ
ശ്ലോകം 1
നമസ് തേ നരസിംഹായ / പ്രഹ്ലാദഹ്ലാദ-ദായിനേ । ഹിരണ്യകശിപോർ വക്ഷഃ / ശിലാ-ടങ്ക-നഖാലയേ ॥
അർത്ഥം: ഭക്ത പ്രഹ്ലാദന് അപാരമായ ആനന്ദം നൽകുന്നവനും ഹിരണ്യകശിപുവിൻറെ ശില പോലുള്ള മാറിൽ ഉളികൊണ്ടെന്നപോലെ തൻറെ തീക്ഷ്ണമായ നഖങ്ങൾകൊണ്ട് പിളർത്തിയവനുമായ ഭഗവാൻ നരസിംഹദേവന് ഞാൻ നമസ്കരിക്കുന്നു.
ശ്ലോകം 2
ഇതോ നൃസിംഹഃ പരതോ നൃസിംഹോ / യതോ യതോ യാമി തതോ നൃസിംഹഃ । ബഹിർ നൃസിംഹോ ഹൃദയേ നൃസിംഹോ / നൃസിംഹം ആദിം ശരണം പ്രപദ്യേ ॥
അർത്ഥം: നരസിംഹമൂർത്തി ഇവിടെയുമുണ്ട്, അവിടെയുമുണ്ട്. ഞാൻ എവിടെയെല്ലാം പോകുന്നുവോ അവിടെയെല്ലാം നരസിംഹസ്വാമി ഉണ്ട്. ഉള്ളിലും പുറത്തുമുള്ള ആ ആദിമൂർത്തിയായ നരസിംഹദേവനെ ഞാൻ ശരണം പ്രാപിക്കുന്നു.
ശ്ലോകം 3
തവ കര-കമല-വരേ നഖമ് അത്ഭുത-ശൃംഗം / ദലിത-ഹിരണ്യകശിപു-തനു-ഭൃംഗം । കേശവ ധൃത-നരഹരി-രൂപ ജയ ജഗദീശ ഹരേ ॥
അർത്ഥം: ഹേ കേശവാ! നരഹരി രൂപം ധരിച്ച ജഗദീശ്വരാ, അങ്ങേയ്ക്ക് ജയം! ഒരാൾ ഒരു ചെറിയ വണ്ടിനെ വിരൽകൊണ്ട് ഞെരിച്ചു കൊല്ലുന്നതുപോലെ, അങ്ങ് താമരപ്പൂ പോലുള്ള കൈകളിലെ തീക്ഷ്ണനഖങ്ങൾകൊണ്ട് ഹിരണ്യകശിപുവിനെ നിഷ്പ്രയാസം പിളർന്നുകളഞ്ഞു.
